Cjamin des Plêfs

Descrizion dal percors

DI RIPÂR TENENT FABBRO A SAPADE - Cheste cjaminade e presente doi pussibii itineraris che si davuelzin in plene montagne. Il prin al è un percors impegnatîf e une vore lunc, che nol da la pussibilitât di vê ponts di poie jenfri il viaç e al pretint biel timp e buine preparazion atletiche: si consee partant di valutâ cuntune vore di atenzion lis propis pussibilitâts e lis condizions ogjetivis. La cjaminade e permet di traviersâ la aree des Alps cjargnelis che e sta a cjaval tra il Friûl e il Venit, in particolâr il grup dai Brentoni e chel des Terze, che a cjapin dentri il cjadin di Sapade, viers Sud. La variant, parimentri lungje e impegnative, si pues, dut câs smiezâle in doi dîs, vint la pussibilitât di passâ la gnot al ripâr Fradis De Gasperi. Il percors al consint di sfiliâ la cueste ocidentâl des Dolomitis di Pesariis. L’itinerari, come chel che o vin a pene fevelât, al permet te stesse maniere, ma di une divierse otiche, di cognossi la aree des Alps cjargnelis che e je a cjaval tra il Friûl e il Venit, in particolâr il grup des Terze e chel dai Claps, che a cjapin dentri il cjadin di Sapade, viers Sud. Il sconfinament intal Venit al permet di meti adun idealmentri la cjaminade des Plêfs cun chê des Dolomitis.