Cjamin des Plêfs

Nature, storie, art e spiritualitât in Cjargne

Lis tapis de Cjaminade

Foto del Cammino

La cjaminade des Plêfs si davuelç in disevot tapis, cun partence di Dimponç di Tumieç e la rivade a Zui.


Dulinvie dal percors si traviersin paîs di montagne e fonts di vals, valadis, riuçs, turints e alturis tra lis Prealps e lis Alps cjargnelis


Ma soredut, si coleghin e si di discuvierzin lis antighis Plêfs, ae ricercje di un passât, cjamât di spiritualitât e di storie, simpri a strent contat cu la nature.


La trate si disglagne dilunc dai trois vieris de basse mont e dai trois alpins dal CAI. Intal so disvilup a anel di scuasit dusinte chilometris al tocje, lant di Est a Ovest il Venit, par finî, tal so tornâ indaûr, viers soreli jevat, ae Plêf di Sant Pieri di Zui, la antighe “Julium Carnicum” dai romans. Cuntune lungjece medie di 14 chilometris, sù par jù, par cjaminade, il percors  al supere, se fat par intîr, un dislivel totâl di rive sù di 8.423 metris.


Lis Plêfs storichis si concentrin, pal plui, inte prime part dal anel, tra Dimponç e For disot. Po dopo si traviersin ancje i trois in cuote ad implen dentri inte nature e localitâts cence Plêfs.


Dispès logadis adalt, su alturis o su spirons dominants, isoladis dal paîs, visibilis di lontan cu lis lôr architeturis semplicis e il cjampanili a flanc, lis Plêfs a jerin inte Ete di mieç lis custodis de identitât dal popul e vuê a son il monument de cristianitât de int alpine di in chê volte.


Il percors al nas tant che un piligrinaç e al è adat ancje aes fameis.


L’itinerari al è marcât di un segn dal troi zâl e de presince di cartelins cul  logo e la frece direzionâl o ben di un segn dal troi dal CAI


Su lis modalitâts par tirâ dongje il materiâl informatîf (guidis, cjartinis, gadgets e vie indenant) e par eventuâls inzornaments su lis tratis de cjaminade, su lis localitâts traviersadis, su lis Plêfs, su lis visitis guidadis, su eventuâi acompagnadôrs e par informazions di caratar turistic (ponts di riferiment e altri) si consee di dâ une cjalade ae pagjine cui conseis, ripuartade intal sît presint, che e ten dentri, cun di plui, indicazions utilis a chel che al intint scomençâ la cjaminade o percori une o plui tapis.


 

Mape de Cjaminade

Liste des tapis