Cjamin des Plêfs

Nature, storie, art e spiritualitât in Cjargne

Aprofondiment su lis Plêfs

Fotografiis  di une Plêf

Lis plêfs a jerin te Ete di mieç entitâts juridic-religjôs-sociâl a cjâf di un precîs teritori. A forin metudis sù tor la epoche tarde-antighe su sburt de evangelizazion che e vignive dai principâls lûcs urbans cristians. Lis plêfs di cjargne, in particolâr, a nasserin sot la sburte de citât di Aquilee e dal so patriarcjât.


In Cjargne, come in dutis lis areis alpinis, a esistevin tal IV secul dome pôcs paîs, i cussì clamâts pagi. Tai pagi a vivevin i pagans di convertî al cristianesim - il pagus, al identificave la comunitât e il so teritori - e il plui impuartant centri di difusion dal messaç cristian in chê aree al jeri Zui, Julium Carnicum, al timp ancje sede dal vescul, cun jurisdizion su dut il teritori cjargnel, buine part dal Cjadruvi e dal Alt Friûl. Al è a Zui, inte antighe basiliche che in  dì di vuê a restin dome rescj archeologjics, che a vignivin dâts fûr il batisim e chei altris sacraments pai abitants che si jerin convertîts al cristianisim. Tal stes timp in Cjargne a forin tiradis sù singulis plêfs, dulà che la int dal puest e leve par ricevi I sacraments. Di fat il tiermin plêf al rive dongje dal latin plebs (popul) e partant al identificave e al rapresentave il popul. Ogni cristian al podeve frecuentâ dome la proprie Plêf.


Purtrop no esistin documents scrits che a certifichin la “plebalità” di une glesie prin dal 1000 e al è dificil individuâ cun precision la date juste di nassite di ognidune di lôr, ancje se si pues, in part, gjavâle fûr cjapant in considerazion diviers elements. In cierts câs la prove sigure che nus da la pussibilitât di identificâ une plêf e je la presince di un font dal batisim (e di conseguence i sgjâfs archeologjics): la Plêf di Sante marie di Guart – identificade intal sît archeologjic di Sant Martin – al è un esempli  che al va indaûr al V secul, graziis al fat che al è stât cjatât un font dal batisim, e e je, seont i studiôs, la plui antighe cjatade fin cumò in Cjargne.


Cuant che a son tacadis lis invasions barbarichis, intal VII secul, e la ritirade des legjons romanis, lis popolazions alpinis si cjatarin bandonadis a se stessis, cence une suficiente protezion. Al fo in chel frangjent che lis Plêfs de volte alpine cressint di numar, a scomençarin a cjapâ sù ancje la fisionomie di struture aministrative e juridiche, oltri che religjose, sburtadis de necessitât di mantignî la organizazion e la identitât dal lûc e dai siei abitants. Di fat i langobarts int ricognosserin il valôr e la utilitât e lis presidiarin par garantî e tramandâ la unitât des popolazions sometudis. Lis Plêfs a nasserin spes in lûcs di alture lontanis dai centris abitâts: a chest si zonte la lôr funzion di avistament e control dai pas e des valadis.


Il non Plêfs in dì di vuê al ven doprât spes in maniere improprie, ancje tai lûcs che o vin cjapât in considerazion. Lis Plêfs storichis de Cjargne siguris e documentadis a son in dut dome dîs: Sant Florian di Dieç, Sante Marie Oltrebut di Tumieç, Sant Stiefin di Cesclans, Sant Martin di Verzegnis, Sante Marie Madalene di Divilin, Sante Marie dal Rosari di Fors Disot, Sant Ilario e Taziano di Denemonç, Sante Marie Anunziade di Soclêf, Sante Marie di Guart di Davâr, Sant Pieri di Zui (undis par cualchi studiôs, che al cjape dentri la glesie di Dimpeç parcè che par un curt periodi, e ve la facoltât di scuedi i tribûts indipendentementri de lidrîs di Castoie).


Intal 813 Carlo Magno al da a lis Plêfs il compit di tirâ sù il cuartês, une impueste eclesiastiche sui introits di lavôr (agriculture, arlevaments, cumierç, miliziis)dulà che la decime part e vignive juste apont indreçade al clericât, pes necessitâts struturâls des Plêfs. Un cuart de decime, il cuartês, al leve al levan. A son propit lis tassis che a dan la pussibilitât di identificâ cun sigurece la esistence di une Plêf  te basse Ete di mieç. I prins doi elencs di Plêfs de Cjargne a son di fat dal 1247 e dal 1296 e a fasin riferiment ducj e doi a tassis: la prime e fo imponude dal Patriarcje Bertoldo di Anderlech ai gleseastics e a altris ents religjôs de Diocesi di Aquilee, probabilmentri par prudelâ l’Imperi latin di orient in viste di une crosade. La seconde e jere une esazion che e vignive di Rome (De Vitt, 2004).


Za de seconde metât dal XII secul lis Plêfs a scomençarin a cjapâ centralitât inte vite cristiane. Dal XIV-XV secul la cressite de popolazion e i discomuts pe ubicazion teritoriâl di diviersis di lôr a sveltirin il fenomen de nassite des parochiis. Lis parochiis a otignirin in numar simpri plui ampli lis funzions che spietavin a lis Plêfs, ven a stâi la cure des animis, un predi, un cimitieri e un font dal batisim, fasint lâ in mancul a planc a planc il rûl.


Al reste dut câs, inte memorie des popolazions, il sens di partignince a lis antighis circoscrizions che a àn conotât la storie passade.